2023/04/04
Joseba Olagarai Goienetxe (Etxalar, 1984) izango da aurtengo jardunaldiko aurkezlea. Etxalarko aurkezleak Pilar Kaltzada ordezkatuko du zeregin horretan, donostiarrak gidatu baitu Udaltop azken edizioetan. Hamabost edizioetan lehen aldiz, Udaltopen aurkezle nafarra izango du beraz.
Joseba Olagarai kazetaria da eta gaur egun Euskal Telebistako Biba zuek! saioan ari da erreportari bezala. 2003az geroztik ari da telebistan lanean, eta besteak beste, Gure kasa, Gu ta gutarrak, Euskal Herria zuzenean edo Arratsaldero bezalako saioetan aritu da. Euskal Telebistaz gain, Ttipi-Ttapa telebistan aritutakoa da, baita Xorroxin eta Gaztea irratietan ere.
Azken urteotan, gainera, telebistako lana aurkezle lanarekin uztartzen ari da. Ongi-etorri Udaltopeko unibertsora.
Izen-ematea, zabalik
Gogoratu izen-emate epea zabalik dagoela maiatzaren 2ra arte. Aurreko edizioan bezala, Lasarte-Oriako Manuel Lekuona Kultur Etxean (65 €, bazkaria eta bi egunetako hamaiketako barne) edo online jarrai daiteke (15 €). Matrikulak webguneko Izen ematea atalean egin behar dira.